ach wemmer funn uns in de ledschde Woche nitt viel gheert hott, war ma gar nitt uutädich!
Mir "schaffen" wie die Verriggde an unserm neie Album, momendahner Arbeitstiddel "Hartwandbrand", sinn in die Designung neuer Textilie verwiggelt unn… mir hänn ä Video gedreht!
Allo eichendlich hänns de Manuel Sattler und de geile Olaf gedreht unn mir hänn nur agiert. Beim Manuel unnem Olaf steh ma halt jetzt ferr de Rescht funn unserm klänne, versaute Läwe kniedief in de Schuld.
Ma hotts halt nitt leicht als Musigger…. do musch dei Seele verkaafe, Alder! Denken an de Robbert Tschonnsn!
S´Lied mit de Farwe hääßt dess gude Stück, was ausgewählt wurd, durch unser erschdi Videoproduktion geadelt zu werre! Ganz schäni Sauerei, awwer s war toll unn hott sauviel Spass gemacht! Do isses:
Ausserdem hodd sichs de Nelt nidd nemme losse unn hodd sich iwwer Saddelitt ins Pogoradio schiesse losse um dort ALLES zu fazehle...so lauschet:
Feschde Konzerttermine gibts leider noch känni, wer also bock hott, was zu organisiere mit uns: immer her demit!
Mir sinn gar nitt soooooo deier, ach wemmers uffgrund unsrer Genialität mähne kinnt!
01/2012
Leise rieselt der Schnee,
kamma do nur saache…. obwohls gar nitt gschneit hott!
Wow!
Dess war jo mo ä ganz haddi Zeit, dess Weihnachde unn Sylweschder!
Unn iwwerhaupt dess ganze Johr!
Wo "es" uns widder iwwerall hiegführt hott, dess Geld Et Nelt do!
So viel Konzerde hämmer nonie ghatt…..
Bschdimmt fascht 20!
Unn so!
De Gipfel war dann ach echt pünktlich am End fumm Johr uffm "Punk im Pott" in Owwerhausen erreicht.
Die mit Abstand greescht Bühn uff dere ma je gschdanne sinn. 15 Meder bräät unn achde dief. Jedenfalls uugfähr. Feddes Lischt unn Dannzplatz bis zum abwinke. 2 Meder Grawe vor de Bühn. Unn vorne dra 34 zune Panker. Am Aafang hännse noch "Wir wollen Blut sehen!" gschrie.
Dann hott de Geld in unendlicher Weisheit paar CDs ins Publikum geworfe unns Et-Görl hottne mo gezeischt was funn pälzer Saufppaadie inspirierder Ausdrucksdanz eichendlich iss.
Do wurdense schunn zahmer…
Unn am Schluss hännse dann uff "Schänes Mädel" gschungelt unn alle warn uuschderblich ins Et-Görl faliebt. Dess war schää!
"Ihr seid ja wohl total schmeazfrei!" hott dennoch änner zu uns gsaacht….
Hahahahaha! Ja!
Unn als dess 1/2-stünniche Konzert vorbei war, hämmer uns umgezoche, de Nelt unns Et-Görl hänn änni geraacht unn not simmer uff Berlin geballert, um dorte in de Jägerklause unser Abschiedskonzert zu schbiele.
Allo, Abschied funn 2011…
Mir warn zwar ganz schää durch funn dem ganze Daach, hänn awwer nommo einiches gebode.
Dancing, understanding, woulding unn overwoulding! Olles debai!
Allerdings hädde ma do wahrtscheins ohne de Romanico Supersensitivi Wilhelmania de Sanctos in Ufero magno, der uns nommo de nödiche Arschkick fabasst hott, erbärmlich abgekackt.
War awwer nitt, sein Tritt war perfekt plaziert unn mir warn widder ä geili pälzer Saufpaadie!
Juhuuu unn Rispect tu da Maximum an de Tino, de Völler unn die geile Smokin´n 44s!
"Sanuel! Sanuel! Mattler! Mattler!"
Chronologisch gsehe war ma nemmich erschmo beim Manuel Sattler uffm Börser am Schdart…
Der wohnt in Saarbrigge unn mir sinn alle relativ hefdich innen faliebt unn mir durften uff seiner Paadie unsern Wahnsinn präsentiere! Die Wohnung war umgebaut bissl, also s Bett war weg unn an dere Stell war ä Bühn uffgebaut midde im Schloofzimmer. Herrlich!
Morchens um 8 hämmer noch bei demm in de Kich rumgschrie wie ä durchgenacheldes Hinkel unn dann halt Kader unn owends weider!
Danke Manuel Sattler! Toll!
Dieses durchaus als einschneidend zu bezeichnende Erlebnis erschien uns kaum je überboten werden zu können! Doch wir wurden widerlegt:
Am 26. beim traditionelle Weihnachtskonzert mit de Gammablitzboys.
Fedde Probs an die saugeile Gammablitzboys sollen an dere Stell in de Orbit gspreadet werre!
Unn denken dra:
ANTASTA HERUM!
Dess war fett, endlich mo widder mit de abgfahrene Züch gezockt unn de Romanico war ach do…
Danke an die viele tolle Musiker wo ferr uns ihr deiri Zeit verschwenden! Feddie Scheiße, Al Ter!
Der Lade war probbevoll, Hitz, laut, geil! Neie Lieder hämmer s erschde mo gschbielt unn die liefen unn sinn gut akumme!
Im Summer plane ma iwwrichens die neggscht CD rauszubringe…
Momentaner Arbeitstiddel: "Das eine ist dem Ding!"
Awwer ruich bleiwe, der ännert sich täglich!
Jo, Johr vorbei!
Weinend vor Rührung sitze ma do unn betrachten die Foddos funn unsere Konzerte unn gedenken unsre uubsiechbare Dänzkru! Ihr tollgude Subberfriiks!
Et Et. Et et Et-Görl. Et de Geldboy. Et de Neltboy.
Wertlose, alde, schwangere Banane wär ma ohne Eich!
Allo, viel Glück im neie Johr an Alle in Allem!
Ach so, ganz vergesse, uff unserm Schbieler hämmer s "Schatzkischdel der Scheiße" neu uffgelade.
Unn ä neies Lied iss ach widder debei!
12/2011
Hallo, ehr ferdiche Baraawer
Iwwerall duuds aafange zu weihnachde...mier henn ach schunn widder so viel Liebe aaxammeld, ummse um Weihnachde rum zu versprühe... mir wern am 26.12. des schunn tradizionelle Konzert mit de Gamma Blitz Boys schbiele im Colosseum zu Landau.
Am 30.12. schbiele mer dank unserm großardiche Organisationstalent middags fumm Äns bis halwer Äns in Oberhausen uffm Punk im Pott, unn dann oowends in Berlin in de Jägerklause um Zehne rum....auaaaa.
Unser ledschde Konzerde waren ach mol widder bizarr unn wunderschön. Mier henn bei de Jasmin uffm Geburtsdaach gschbielt uffre Bühn, in dere Bääm gschdanne sinn...des war toll...unns gaab ALLES zu dringge....was zu Textverluschd unn aariche Schwankunge in unsre Rhytmus-Sektion gführd hott.
In Karlsruh hemmer dann mit de krangge Tübbe unn Määdle funn HGich.T gschbield. Mir sinn echd e paar schüchterne Biewelscher geche die. Die Karlsruher henn und trotzdem geliked unn es war toll, endlich mol dort schbiele zu kinne....wollde mer jo schun lang emol. Leider hodd irchend änn Heggepenner unsern CD-Player gschoord...der Wwwwwwiiixer! Jetzt misse mer uns n neije kaafe unn widder e neuji Bedienungsaaleidung ausewenzich lerne.
Ansunschde is noch zu saache, daß jetzt endlich die Texde funn de "Bass Uff" onlein sinn...unser Programmierer gheerd doch mol gschwaade...
Also dann schummo "Häbbi Krissmess" unn so.
10/2011
Hello Piepel
Es gebbd viel Aldes unn Neijes zu berichde:
Aldes:
Mir warn mol widder beim tolle Toni Mahoni in Berlin zu Gaschd. Der machd die beschde Sändwitschs unn singd wien Rohrschbatz. Mir sinn in tiefie Bewunderung verfalle. Danke Toni! (unn ach dangge an die ganz Band unn Meta Mallorca für Elvis und die warme Liebe)
Dann simmer aschliessend nooch Heidelberch gfahre ins Kosmodrom unn henn unsern guuude alde Sattler unn sein jodelnde Bruder getroffe. Die henn e tollie Schou abgezoche in lupenreinem Saarländisch. Ach hier widder e Verbeuchung. Die 15 zahlende Leut, wu do warn henn gemacht als weerens 300. Fett! Denooch noch e wunderbarie Proweraumsession mitm Evel an de Bloggfleet of hell...wie kammern Daach scheener abschliesse?!
Neijes:
De Player bei Musik hemmer mol e bissl geordnet....jetzt sinn noch e paar uralde Kamelle unn e neijes Lied debei. Des wolle mer ach so beibehalde, dassmer immer mol widder newe de aktuelle Lieder e paar alde Schabragge hochladen, dassner mol sehen das mer uns mit de Zeit ganz scheh gemachd henn (sollt ma garnidd glääwe....) ...dann wollemer immer noch e brandneijes hochlade wu mer frisch gebuit henn (des is dann immer noch ziemlich kagge abgemischd unn nidd gemastert, awwer mer kann erkenne wassmer wollen). Da mier jo aus myspace raus sinn, wolle mer do jetzt eich immer tollie Musigg fer eich paraad hawwe...
Mier henn im November e Konzerd in Karlsruh...endlich! Unn dann ach noch mit de genialbescheuertkabutte HGich.T. Des kann was gewwe. Ich hab jetzt schunn Kobbweh.
Dann simmer noch ennie funn 74(!) Band uffm tribute dobbel sampler funn de Japanische Kampfhörspiele. Mier henn en 30-Sekünder beigschdeuert.
Do guggn. So siehts dann aus wanns faddich is:
08/2011
Särwuss Leit
Schäh warn die ledschde Konzerde mit eich:
In de Muschl in Landaach im Goethepark...unser erschdes öffentliches Unplugged-Konzerd in Landaach. Unn des mitm grossardiche Forum Romanum an de Quetschkommood, der mit seim wunderbare Schbiel ach de Weddergodd zu besänfdiche gewissd hodd. Viel Leit warn do...sautoll...ach m Sattler seiner unn de Mischa aus Saarbrigge funn Wohnwahn.tv warn do. Mit denne ware mer dann noch bis morchends in de Kich fumm Nelt seine Eltre rumxesse, unn die henn uns Lieder vorgschbield. Wunderschäh!
Dann durfde mer in de Villa Nachttanz in Heidelberch schbiele. Es warn scheener Summerdaach unn mier sinn mim vollgeladene VW Geld et Nelt agschibbert kumme.
S erschde was mer xehe hänn war e rieeesische Open Air Bühn. mier henn uns schun mental in die Hosse gemachd...awwer mier sinn gleich ufffgekläärd worre, dass dort nur de Poetry Slam stattfind unn mier dann im klenne dunkle Keller schbiele sollen. Ach guud.
Nooch unn nooch sinn dann unser Et, s Et-Girl unn die Abgefahrenen Züge akumme unn mier henn uns schummo warm gemachd.
Als der Poetry Slam dann rum war, hemmer losgeleggd. Funn Aafang a stand do son Typ halwer uff de Bühn (so mit emme Fuß logger uff de Bühn), mit Sunnebrill, Aazug unn ennre versteinerte Miene. Voll der Disser. Awwer do hodder t Reschnung ohne unser Dänzerinne gemachd: Die hennen agedanzd, abgfülld unn zum Schluß sogar e klennes Lache uff sei ultrakuhli Fress gezaubert. S sinn hald die beschde der Welt!
Denooch gabs noch e Paady im erschde Schdogg. Dort hemmer erschdmol bissl fazehld, awwer als dann des ohrenscheinliche Rausschmeisserlied kumme is, hemmer nommo so richdich uffgedrehd, um dann nommo e 2 Schdunn dauerndie Rausschmeisserserie als Aaschborn zu nemme, nochmol alles zu gewwe.
Alses dann langsam hell worre is, hodd de Hannes uns abghalfderde Ponies in unsern Stall gführd. Dangge, Hannes.
E echd tolles Feschd. Die Veraaschdalderin hodd gemähnd: " S neggschdmol angaschier ich eich alle als Dänzer". haha
Weifeschd Nussdorf war danns neggschde Konzerd. Et Et et et Et-Girl waren do unn henn mol widder gezeichd wasses hääsd sich richdich zu verkleide. De Akkordeur Ramon is extra widder eigflogge kumme.
Die Hall war toll voll unn hodd uns so abfeiert....dangge!!! De Ramon hodd faschd sei Akkordeon bei seim Geilsau-Solo in alder The Who-Manier zerschmeddert.
So kanns weidergeh...in Queichhambach, in Saarbrigge, in Heidelberch unn in Owwerhause...do mol e paar Flyer:
07/2011
N Haufe Konzerde unn Pogoradio
Wie hodd de Nelt ledschdens xaachd: "Oar heer, ma henn garkä Konzadde mäh!" ... unn zack, schunn hachelts Termine. Landau, Heidelberch, Saarbrigge, Owwerhause...guggen äfach mol unner Konzerde nooch.
Unser liebschder Radiorüdi hodd uns zamme mit de Jenny sowas wie e akkustisches Denkmal xetzd mit emme 30 Jahre Geld et Nelt Sommerspecial. Mir sinn zu Trääne gerierd. Dangge, Rüdi un Jenny! Do kammer des ganze heere.
06/2011
Schönen guten Abend,
im Fernseh laaft Frauefussball-WM unn mir lossen die leddschde Daache rewü passiere…
Alder, war dess fett!
Zuerscht durfte ma ihm Toni Mahoni sei Häämspiel im Mellowpaik in Köpenick eröffne unn dann hänn uns die beide wunderbare Sickols aussem Toaschder in Friedrichshain mo widder mitre Flasch fumm feinschde owwerurseler Mirabellewasser abgefüllt unn mir defür denne ihrn Lade gerockt.
Wer hätt gedenkt, dass ma mo so viel Konzerte in Berlin spielen unn dann annoch einichermaßen gut aakummen, gschweiche denn fett abgfeiert werrn…
Aagfange hotts im Prinzipp schunn glei middem Taxifahrer, wu uns nooch Köpenick gebroocht hott. Der war ganz begeischdert defu, dassma Musik machen unn hott uns uugfähr uff de Hälft funn de Fahrt gschdanne, dasser ach Musiker iss unn zwar Sänger unn Imitator innre Kawwerband. Unn dann gings los…. Elvis konnter subber, Udo Lindenberg iss jo eh immer n Hit, Louis Armstrong war cool, Michael Jackson ging allerdings gar nitt unn Frank Sinatra musser annoch bissl üwe. Es war jedenfalls ä sehr
unnerhaltsami Fahrt unn zur Belohnung hämmerm ä CD geschenkt funn uns (funn wemm ach schunnsch).
De Mellowpaik war dann son Skater- unn BMXer-Park mit lauder so Bahne unn Halfpipe unn Swimming pool unn was ach immer…
Der ganze Park licht an de Spree unn direkt am Ufer war die Bühn. Sehr lauschich, sehr urich mit Bääm ausserum unn alles.
S Wedder hott uns bissl Sorche gemacht, weil Reche gemeld war unns dauernd so komisch war am Himmel.
Awwer, grad so als obs de Gott gäb unn er uns saugut leide könnt, ging pünktlich zum Konzertbeginn die Sunn uff unn hott uns mit unsere kranke Sunnebrille der Lächerlichkeit enthowe. Danke! Gott!
Mir hänn wunnerbar uffgschbielt, toller Bühnesaund (üwwerhaupt alles perfekt organisiert, fascht bissl zu perfekt) unn kamen ach ganz gut a. Suggar 6 CDs hämmer verkaaft! Motherfucking business in a goddamn win-win-situation kamma do nur saache!
Was dann beim Toni abging spottet jedre Bschreiwung.
Er kummt halt ursprünglich aus Köpenick unn iss abgfeiert worre, als gäbs kää Morche mär!
Dess hott ihn unn die Band nadierlich ach widder aagschpornt unn dess hott nadierlich die Begeischterung erhöht, was widderum die Toni Mahonis aagschpornt hott…
Sozusaache eine Glücksrückkopplung der Sammsdachowendunnerhaldung…
Dess werr ma da nie vergesse, Toni! Dass ma do ferr Dich eröffne durften!
Unn dann de Toaschder! Yeah!
An demm Daach war fete de la musique in Berlin unn alles war am Aafang bissl stressich, weil ma Bands sehe wolltn unn Leit treffe, de Nelt hott ersch noche Sick Eater konzert spiele misse unn lauder so Sache.
Die saugeil Toaschderkru hott awwer kää Koschde unn Mühe gscheut unn ä klänni Bühn in de Raucherraum gebaut unn de Geld hott ekschtra sei neui Xangsaalach aus de Vorderpollz uff Berlin flieche losse unn als dann um elf die Hälft funn unserer Gage (bsachdi Flasch feinschdes owwerurseler Mirabellewasser) in unsere Mäche aakumme iss, alles mikrophoniert war unn mir, nadierlich wunderwunderschää verkleidet, ufff die Bühn kamen, stand ämme Triumphzuuch nix mä im Wech!
Unn dess wurds dann ach. Der Raum war voll, s Publikum ach, mir ach, alle hänn xunge, mir hänn suggar "feinerle", "mai messa glänzd ach in deim rigge" unn
"pälzer bu" veranplackt, was zimmich cool geloffe iss unn eichendlich isses n herrlicher Traum, dass es äfach nie mehr uffgheert hätt.
Leider, wie so vieles, nur ein Traum.
"Aber wären wir ohne Träume nischt nur leere Hüllen?"
"Bobbel nitt son Scheißdreck doher!"
Wie ach immer, fedde Probs nommo an de Toaschder, es war ganz toll. Unn mir hänn ach schunn mit de äne Sickole ausgemacht, dass ma dess ab jetz minneschdens 2mo im Johr widderholen.
Uhuhunn…. anommo fedde Probs an de Romanico Supersensitivi Wilhelmania de Sanctis in Ufero magno der unner Oisatz seines sozialen Gefüges unsern pällzer Mundartwahnsinn uffm Akkordeon vergoldet hott unn ach in Zukunft, wenns sein Terminkalenner erlaubt, vergolde werrd…
Neggschder Termin, um zu bewunnre, wie de Romanico unns fett funn hinne nemmt: 17.07.2011 im Goethepark zu Landau bei "grün rockt"!
Gruß unn Kuss
Geld et Nelt
05/2011
hello boys and girls,
meine sehr verehrten damen und herren
hobbauf ihr kalenderbanane, ihr quadratbanane ihr dreggiche,
wir produzieren eine beeindruckende mischung aus trashiger mucke, philosophisch höchst anspruchsvollen texten, pfälzischer mundart, philosophisch höchst anspruchslosen texten und der kompletten bandbreite, die durch diese vier koordinaten
begrenzt wird, sofern man bandbreiten überhaupt durch koordinaten begrenzen kann.
mit demm satz hämmer mo versucht uns bei paar booking-agenture zu bewerwe, es kam nonidde mo ä absaach zurick....
okay, er iss nitt pällzisch unn er kummt vielleicht bissl schwachsinnig unn/odder abgfahre riwwer, weil er uns awwer so gut gfallt, hämmer bschlosse ihn als begrüßungssatz funn unsere neije webscheiße zu benutze. uff dere ma eich hiermit herzlich begrüsse wolln.
die alt hott uns äfach zum hals rausghange unn do hämmer gedenkt, mir bauen mo ä frischi.
niikelnaakelneu iss alles unn mier hänn suggar paar neue kadegorie dezu gfücht...
unn... ja, dess do owwe sinn bud neltler unn geldence hill!
iwwrichens hämmer achn fedde player druff unn gehn demnäggsch bei myspace raus, dann kinner die mucke do uff unsere seit heere....
kinner abgeh! daunloude! imäile! nur pouschde unn ädde geht nitt....
awwer ma kann jo nitt alles hawwe, schunnsch wärs jo ach widder langweilich.
sauviel schbaßmacht
geld et nelt
